Gwamnan Ribas, Fubara ya rattaba hannu a kan kasafin 2025

Gwamnan jihar Rivers, Siminalayi Fubara, ya sanya hannu kan kasafin kudin shekarar 2025, wanda ya kai Naira tiriliyan 1.188.
Mai magana da yawun gwamnan, Nelson Chukwudi, ya wallafa bidiyon bikin sanya hannu a shafin Facebook, wanda aka gudanar a ranar Alhamis.
Gwamnan ya rattaba hannu kan kasafin kudin ne a gaban jagoran bangaren adawa na majalisar dokoki, Victor Oko-Jumbo, tare da wasu ’yan majalisar da ke goyon bayansa.
Fubara ya gabatar da kasafin kudin ne kwanaki biyu kafin sanya hannu, inda ya mika shi ga ’yan majalisar dokoki guda biyar don duba shi.
Tarihi ya maimaita kansa, domin a shekarar da ta gabata, gwamna Fubara ya gabatar da kasafin kudin 2024 mai kimar naira biliyan 800 ga ’yan majalisar dokoki hudu, wanda aka amince da shi cikin kasa da awa 24.
Gwamnan Ribas, Fubara ya rattaba hannu a kan kasafin 2025