Majalisar dokokin jihar Kogi ta amince da Kasafin Kudin 2025

Majalisar dokokin jihar Kogi ta amince da dokar kasafin kudin shekarar 2025 mai kimanin Naira biliyan N582,404,119.489.
Amincewar da aka yi wa kasafin kudin ya biyo bayan nazarin rahoton da kwamitin lura da kasafin kudi da tsare-tsaren tattalin arziki ya gabatar wa majalisar.
Tun da fari, Gwamna Ahmed Usman Ododo ya gabatar da kasafin kudin shekarar 2025 na Naira biliyan 582.404 ga majalisar a ranar 3 ga Disamba, 2024, domin neman amincewarta.
Kakakin majalisar Hon. Aliyu Umar Yusuf ya ce kasafin kudin ya tanadi yadda za a rarraba kuɗaɗe ga dukkan ma’aikatu da hukumomi don haka zai fara aiki daga ranar 1 ga Janairu, 2025, zuwa 31 ga Disamba, 2025.
Kakakin Majalisar ya gode wa mambobin majalisar kan sauke nauyin da ya rataya a wuyansu na tantance da kuma amincewa da kasafin kudin.
Majalisar dokokin jihar Kogi ta amince da Kasafin Kudin 2025