Sojoji sun kashe ‘yan ta’adda 10,937 a 2024

Sojoji a fadin kasar nan sun kashe ‘yan ta’adda 10,937, ciki har da sama da dubu daya da suka kasance shugabannin da manyan jagororin su, sannan sun ceto wadanda aka sace 7,063 a cikin shekarar 2024.
Sojojin sun kuma kama ‘yan fashi 12,538, yayin da ‘yan ta’adda 16,171 tare da iyalansu suka mika wuya.
Daraktan Labarai na Tsaron Kasa, Maj-Gen Edward Buba, ya bayyana wannan a ranar Talata yayin da yake jaddada nasarorin sojojin a cikin shekarar da ta gabata.
Wasu daga cikin shugabannin ‘yan ta’adda da aka kashe yayin hare-haren sojojin a 2024, a cewar Gen. Buba, sun hada da Dutse Mainasara Idda, Mallam Saleh Umaru, Mohammed Amadu, Chinemerem (wanda aka fi sani da Bam Bam), Jeremiah Uzuoma (wanda aka fi sani da Escoba), Tochukwu Awo (wanda aka fi sani da Ojoto) da Egwuatu, da sauransu.
Ya ce sojojin sun kwato makamai 8,815, da harsasai 228,004 daga hannun mayakan ta’addanci da sauran masu aikata laifuka a shekarar da ta gabata.
Makaman da aka kwato, a cewar mai magana da yawun tsaron, sun hada da bindigogi 4,332 na AK47, bindigogi 1,244 na hannu, bindigogi 838 na dane, bindigogi 259 na famfo, da makamai 2,131 na nau’i daban-daban.
A cikin rahoton da aka bayar game da nasarorin da aka samu a yankin Niger Delta, Gen. Buba ya ce sojojin sun kwato lita miliyan 56,223,002 na mai da aka sace, lita miliyan 9,735,836 na man fetur da aka tace ba bisa ka’ida ba, lita 95,595 na kerosene, da lita 156,527 na man fetur wanda kudinsu ya kai kimanin Naira biliyan 68.
Sojoji sun kashe ‘yan ta’adda 10,937 a 2024